Malta Football Association
NEWS:
Jirritorna l-Kampjonat BOV Premier
Oct 15, 2015
Posted in:
General
BOV Premier League
Ritratt: Domenic Aquilina
Ritratt: Domenic Aquilina

 

Wara l-waqfa tal-aħħar żewġ partiti tat-tim nazzjonali Malti minn Grupp H ta’Kwalifikazzjoni għall-Kampjonati Ewropej 2016, fi tmiem il-ġimgħa li ġejja jirritorna l-Kampjonat BOV Premier b’diversi partiti mill-iktar interessanti.

 

Is-Sibt li ġej, jintlagħbu erba’ partiti, tnejn fil-Victor Tedesco Stadium, fil-Ħamrun u tnejn fl-Istadium Nazzjonali, f’Ta’ Qali.


 

Fil-Ħamrun, fit-3.00pm, tintlagħab il-partita bejn Pembroke Athleta FC u Tarxien Rainbows FC. Iż-żewġ naħat kellhom bidu tajjeb f’dan l-istaġun u forsi ssorprendew lil ħafna nies. Żgur li minn dan il-konfront iridu jkomplu jieħdu l-punti biex jitilgħu lejn in-naħat ta’ fuq tal-klassifika.

 

Fil-5.15pm tibda l-partita bejn St Andrew’s FC u Balzan FC. Il-Balzanin, preżentament fl-ewwel post tal-klassifika, jibdew favoriti li jirbħu dawn it-tliet punti kontra tim li s’issa għadu ma sabx saqajh fil-Kampjonat Premier. Iżda m’hemmx dubju li biż-żgħażagħ u l-materjal li għandhom St Andrew’s, ilkoll kapaċi jagħmlu ftit tas-sforz żejjed li bih kapaċi jibdew jirbħu xi punti u jipprovaw iżommu posthom mal-kbar.

 

Fl-Istadium Nazzjonali, fit-3.00pm, tibda l-partita bejn Qormi FC u Hibernians FC. Il-Qriemi għandhom tim pjuttost żagħżugħ u li bih qed jagħtu sfida denja lil kulħadd. Diġa’ ġabu xi punti u dan se jagħmel it-taqtiegħa għas-salvazzjoni waħda mill-iktar akkanita lejn l-aħħar tal-istaġun.

 

Hibernians FC iridu jżidu fil-logħob tagħhom. Hu evidenti li għadhom ’il bogħod mill-forma li kienu biha s-sena l-oħra meta saru champions tal-futbol Malti iżda bil-plejers li jipposedu kapaċi jirbħu lil kull tim f’pajjiżna f’kull mument.

 

Fil-5.00pm jintlagħab id-derby bejn Mosta FC u Naxxar Lions FC. Il-Mostin jibdew favoriti li jirbħu din il-partita u anki għax it-tim li għandhom jidher fuq il-karta aħjar minn tal-avversarji tagħhom. Bdew il-Kampjonat fuq nota tajba b’diversi rebħ u wieħed jawguralhom li jibqgħu sejrin fuq din in-nota pożittiva.

 

In-Naxxarin jidher li għandhom xi problemi fl-iskwadra meta kkumparat mas-sena l-oħra. It-tim għadu żgħir wisq u ħafna plejers m’għandhomx dik l-esperjenza neċessarja li jissorprendu meta jkun il-waqt. Iżda plejers ta’ kwalita’ għandhom ukoll tajbin biżżejjed biex jagħmlu dan il-konfront wieħed mill-aktar missielet u denju ta’ derby.

 

Il-Ħadd, fl-Istadium nazzjonali wkoll, ikollna l-aqwa żewġ partiti ta’ tmiem il-ġimgħa.

 

Fit-3.00pm tibda l-partita bejn Sliema Wanderers FC u Birkirkara FC. It-tim ta’ Giovanni Tedesco jibda xi ftit aktar vantaġġjat u dan minħabba l-kwalita’ ta’ plejers li indiviwalment huma ta’ livell ogħli ħafna. Rebħa biss tikkuntenta lill-Istripes biex ikomplu mexjien fit-triq li jirbħu l-Kampjonat dan l-istaġun.

 

Sliema Wanderers FC jidher li qed jużaw pjan prudenti għal kull partita li jilagħbu. M’humiex l-aqwa tim tal-Kampjonat iżda kapaċi jagħtu partita tajba lil kulħadd u għalhekk m’hemm l-ebda riżultat ċert f’dan il-konfront.

 

L-aħħar partita ta’ tmiem il-ġimgħa tkun id-derby bejn Valletta FC u Floriana FC. M’hemmx dubju li din hi l-partita tal-ġimgħa bejn dawn iż-żewġ naħat. Il-Beltin jibdew xi ftit iktar favoriti li jirbħu din il-partita. Għandhom skwadra magħquda u l-kowċ Paul Zammit jidher li daħħal motivazzjoni u enerġija ġdida fil-plejers tiegħu.

 

Floriana FC għandhom diversi plejers ġodda iżda xorta bi skwadra li tista’ tilgħab futbol sabiħ taħt kowċ bħal Luis Oliveira li lagħab futbol professjonali fi żmienu. Il-partita għandha l-ingredjenti kollha biex tassew, “il-partita tal-ġimgħa”.

Official Sponsors
Commercial Partners